Банк көшірмелерін 1С-ке жүктеу және тексеру
Үш банктің көшірмелерін «Қазақстанға арналған 1С:Бухгалтерияға» жүктеу құралын әзірледік. Операциялар бойынша контрагенттер, шарттар және қайталанулар тексеріліп, төлем құжаттары өткізілмей сақталады. Техникалық сынақтар аяқталды; келесі кезең — база көшірмесінде бухгалтердің қабылдау сынағы.
Көшірмеде төлемдер туралы ақпарат бар, бірақ 1С-те жұмыс істеу үшін контрагентті тауып, шартты таңдау және бір операцияны екі рет жүктемеу қажет. Бірнеше банкпен жұмыс істегенде бухгалтер осы әрекеттерді құрылымы әртүрлі файлдармен қайталайды.
«Қазақстанға арналған 1С:Бухгалтерияның» 3.0 редакциясы үшін жеке тексеру кезеңі бар көшірме жүктеу құралын әзірледік. Оның міндеті — бухгалтердің орнына есеп жөнінде шешім қабылдау емес, оған деректерді дайындау. 1.0.14.1 нұсқасы техникалық сынақтан өтті және жұмыс базасының көшірмесінде қабылдау сынағына дайын; өндірістік пайдалануға енгізілгені әзірге расталған жоқ.
Алдымен операцияларды көру, содан кейін құжат жасау
Жұмыс ұйымды және оның банк шотын таңдаудан басталады. Бухгалтер бір көшірмені жүктейді, ал операциялар ортақ кестеде көрсетіледі: күні, төлем бағыты, деректемелері, шарты, мақсаты және тексеру хабарламалары. Файлдың оқылғаны оның барлық жолын сақтауға болады дегенді білдірмейді.
Bereke Bank, ForteBank және Банк ЦентрКредит көшірмелерінің ұсынылған XLS және XLSX форматтарындағы Excel файлдарымен жұмыс істеуі расталды. Әр төлем үшін ұсынылған мәндерді тексеруге, түзетуге немесе жүктеу белгісін алып тастауға болады. Түзетілген жолдар қайта тексеріледі. Жасалған кез келген төлем тапсырмасын нәтижелерден бірден ашып, түпнұсқамен салыстыруға болады.
Ұқсас контрагенттер мен төлемдерді қалай ажыратамыз
Контрагент ұқсас атауы бойынша емес, нақты БСН немесе ЖСН бойынша ізделеді. Егер карточка табылмаса немесе бірнеше сәйкестік болса, шешімді бухгалтер қабылдайды. Құрал жаңа карточкаларды өздігінен жасамайды. Шарт та осылай тексеріледі: ол қажетті контрагент пен ұйымға тиесілі болуы керек; кездейсоқ таңдау арқылы белгісіздікті жасыруға болмайды.
Қайталанатын төлемдерге арналған ережелер бар. Мысалы, бухгалтер аударым бағыты мен төлем мақсатындағы тұрақты тіркесті операция түріне және ақша қаражатының қозғалыс бабына байланыстыра алады. Бұл бап төлемнің ақша қозғалысы туралы есептерде қай санатқа кіретінін анықтайды. Жеткізушіге төлеу, салықтар және өз шоттары арасындағы аударымдар сияқты тоғыз типтік сценарий бар. Баптар компанияның базасынан таңдалады.
Қолмен таңдалған мәндер қайта тексергенде сақталады. Басымдығы бірдей екі ереже сәйкес келсе, мәндер нақтыланғанша автоматты бөлу тоқтатылады. Жекелеген операциялардың және бүкіл файлдың қайталануы тексеріледі.
Құжат неге өткізілмей сақталады
Түсім үшін кіріс төлем тапсырмасы, шығыс үшін шығыс төлем тапсырмасы дайындалады. Тек жаңа құжаттар жасалады; бұрынғылары қайта жазылмайды. Сақтау алдында сервер алдын ала тексерудің ескірген нәтижесіне сүйенбеу үшін таңдалған жолдарды тағы тексереді.
Өткізілмеген құжат — базада сақталған, бірақ есепте әлі қозғалыстар қалыптастырмайтын жоба. «Төленді» белгісі де қосылмайды. Бухгалтер жобаны ашып, деректемелерін тексереді және оны 1С-тің стандартты командасымен қашан өткізу керегін өзі шешеді. Сақтау бәрібір базаны өзгертеді және құжат нөмірлерін пайдаланады, сондықтан алғашқы сынақтар оның көшірмесінде жүргізіледі.
Сынақтар нені көрсетті
- Bereke Bank-тің XLS файлынан 30 операция, ForteBank-тің XLSX файлынан 3, Банк ЦентрКредиттің XLS файлынан 6 операция оқылды. Бұл жолдардың барлығы қолмен тексеруге қалдырылды: бұл — файлдарды оқу нәтижесі, автоматты түрде қабылданған 39 төлем емес.
- Жеке сынақ кіріс құжатының өткізілмей, төлем белгісінсіз және тіркелімдердегі қозғалыстарсыз сақталғанын растады.
- Жол мен файлдың қайталануы қайта сақтау алдында анықталды. Ережелердің сақталуы, бос, бүлінген және белгісіз файлдардың өңделуі тексерілді.
Шешімнің мүмкіндіктері қай жерде шектеледі
Үш банкті қолдау барлық банк үлгісімен үйлесімділікті білдірмейді. Жаңа формат үшін үлгі және жеке тексеру қажет. PDF мәтіндік қабатын талдау дайындалды, бірақ тексерілген платформада серверлік мәтін шығару жұмыс істемеді. Сондықтан PDF жүктеуді әзірге жұмыс істейтін мүмкіндік деп санауға болмайды: сәйкес серверлік компонент пен қайта сынау қажет. Сканерленген құжаттарға бұған қоса алдын ала мәтінді оптикалық тану — OCR қажет.
Құрал екі нұсқаның бірімен жеткізіледі: CFE кеңейтімі — қосымша функциялары бар қосылатын модуль немесе EPF сыртқы өңдеу құралы — 1С ішінде бөлек іске қосылатын құрал. Негізгі конфигурация тікелей қайта жазылмайды; екі нұсқаны қатар орнатудың қажеті жоқ. Қолжетімділік құқықтары, үйлесімділік және бұлттық сервис шарттары енгізу кезінде тексеріледі.
Келесі қадам — нақты міндеттер бойынша қабылдау сынағы
Әзірлеменің практикалық нәтижесі — көшірмелерді оқу, күмәнді деректемелерді тексеру және төлем құжаттарын дайындау үшін бір орын. Күнделікті жұмыста қанша уақыт үнемделетіні әзірге өлшенген жоқ. Іске қоспас бұрын бухгалтер ережелерді бекітіп, база көшірмесінде нақты көшірмелерді салыстыруы және кәдімгі пайдаланушы тіркелгісімен бір өткізілмеген құжатты тексеруі керек.
Бухгалтерияңыз банк операцияларын қайта-қайта қолмен енгізсе, міндетті JEL Studio мамандарымен талқылаңыз. «Бәрін автоматтандырамыз» деп уәде берудің орнына, нақты үдерісіңізге сай жетілдіру ұсыну үшін көшірме форматтарын, база шектеулерін және тексеру тәртібін талдаймыз.